…E ul 25 d’otobre semm nai anca a Berna!
I è i cinq da matina e sa trövum tücc’ sü al Ceneri, indua ga specia ul pullman. Semm in una trentena tra güzzisti, parent o amis.
Ul Roby president, l’è dré fa la spunta, strano la Lory indua l’è? A cà cul Covid! Partisum che l’è ammò scür ma sül pullman gh’è già animazion. Poldo e cumbricula in fund, Geni e Rita in mezz , Roby e cumpagnia davanti. Viagg’ tranquill, ma dopu tre ur bramavum un caferin…..L’autista al g’heva pagüra da incuntrà trafic e da miga rivà in temp par i 10.30 . A 30 km da Berna finalment podum godess ul café. Rivum a Berna in anticip e sa invium vers a Palazz Federal par la visita prevista.
Berna l’è ‘na bela città cun i so 6 km da portich pien da butegh. L’ è vüna di passegiat sota i portich püsse lunga d’Europa. Dismentighem miga i so funtan indua l’aqua l’è potabila perché ‘na volta a sa rifurniva tücc qui che stava in città. Gh’è anca la tur da l’urulocc cun i so personagg che gira e pö la città vegia l’è patrimoni da l’UNESCO.
In piazza Federal gh’è ul mercat. Fu un girett tra la früta e la verdüra metüda ben in bela vista… bé, se dovaresi cumprà la verdüra par fa ul minestron… ma costaress da meno mangià un filett al risturant!!!
Ai 10.30 semm tücc present par nà denta a Palazz. L’è cuma vess in aeroport: passaport, metaldetector e cuntroll di bursett o zainetti. Denta ga specia la nossa guida: ‘na Riva DOC da Lügan, simpatica e preparada. Ul noss president da la Cunfederela l’ha miga podüt ricevigh perchè impegnat a Berlin cun la cunferenza sü la ricostrüzion da l’Ucraina.
Femm la nossa visita: atrio e scarinada principal, sala dal Cunsigli da Staat, pö quela di Cunsiglier Nazionai e natüralment la Sala dei Passi Perduti. La guida la ga spiega che, anca se nümm Ticines semm in pooch a Berna, (quest’ann però g’hemm ul Cassis president da la Cunfederela) gh’è tantu Tisin nal Palazz Federal. Anca la Sala dei Passi Perduti l’è staja pitürada da un Ticines: Antonio Barzaghi Cattaneo da Lügan, e l’è miga l’ünica opera. Ogni tant la nossa guida la ga “interoga”… semm nincorgiüd da vess un zicch arüginit in fatto da Civica … Finida la visita ringrazium la guida e sa invium vers al risturant.
Ul Roby l’è agitaat. Già da un quaj dì al dumandava cunferma par la Bärnerplatte che l’heva cumandat par discnà, senza avegh risposta. In più ul gestur al g’heva racumandat da vess in urari senò al g’havress miga tegnüt ul post!… Bé hemm mangiat quell che gh’era! Roby ciapatala miga che al semm benissim che in denta sa và miga par fa ‘na bela mangiada!
Dopudiscnà liber: visita a la fossa di urs che l’è staja ingrandida nal 2009. Pare che ul fundadu da la città l’ebbia copat un urs propi in zona. Sa dis che ul nom da la città al vegna da lì e che i Bernes fin dal 1500 i ebbia tegnüd di urs cumè portafortüna . Anca la bandiera la g’ha sü l’urs.
Girett par negozi, passegiada nal centro o girett in riva a l’Aar.
Ai 3.30 tücc sul pullman. Rientrum in Tisin dopu pausa al Rastätten. Hemm passat ‘na bela giurnada interessanta, anca ul temp l’è staj da la nossa. Grazie president par l’organizzazion!
Ah, Mano, stavolta i güzzisti i è turnat a cà tücc insema!!!!!!
Mariella, Silvano
